عبرا فصيلا "غرين بويز" و"أولترا إيغلز"، عن أسفهما و غضبهما عبر بلاغ مشترك، تضمن رسائل شديدة اللهجة، لرئيس نادي الرجاء الرياضي رشيد الأندلسي.
وانتقدت جماهير المجمع الجنوبي، الأندلسي، بسبب تصريحات أكد من خلالها أن النادي لم يستفد شيئا من الجماهير"، ما أثار غضب الأنصار، التي وصفته بـ"الرئيس المؤقت".
وفيما يلي نص البلاغ:
إلى ما يسمى " الرئيس المؤقت"
عطيتي 8 أشهر من حياتك للرجاء، كاين لي ضربها غا حبس، باش عاونتي الفرقة نتا باش تقول الجمهور ما عاونش الفرقة؟
جمهورها راس مالها، هو لي ما هبطش يديه من لي بدات الأزمة لدابا، ماشي كانمنو على الفرقة ولكن راه ماشي نتا لي شريتي وراق أيام الويكلو، ماشي نتا لي كل عام كاتدير بطاقة الإشتراك، ماشي نتا لي كنتي كاتدخل للتيران بخمسين درهم، أكفس من هادشي، ماشي حتى نتا لي جبتي طيارة لزامبيا، بل المجموعات و المنخرطين، الجمهور يكفيه أنه ماشي سبب مهزلة تونغيت، هاديك بوحدها خاصك تقلب بسببها على الشأن الرياضي.
نهار الاجتماعات لي تدارو مع المجموعات على ود تسيير الفرقة، كنتي كاتدوي بحال الكلب، وصلو الفلوس بانو نيابك، خصوصاً نتا عارف دونور مسدود، أما كون "صدعو ليك راسك".
علاش تحسب لراسك هاد الكأس، وماتحسبش لراسك ديون أغلب هادوك لي مشات عليهم ميزانية فالنزاعات، حتى لي ماكنتيش فالعهد ديالو رئيس راك كنتي فالمكتب.
العام لي قبل وصلو البطاقات لـ13000 علاش فنظرك هاد العام وصلنا غير لثلث هاد العدد، حيت الثقة فيك مابقاتش عند الرجاويين، وكانعدروهم حيت ملي كاتشوف رئيس كايصرح بحاجة و مورا 3 أيام كايطرا العكس راه باينة هاد الرئيس ما دار حتى حاجة باش يآمن بيه ولا يتيق بيه بنادم يعطيه رزقو فالتذاكر لي جاو من بعد، نهار تمشيو جمهور الرجا غادي يدير 20 ألف بطاقة.
كنتي كاتقول تضررنا من غياب الجماهير، بلاصة ما نتوض تلقى صيغة تهبط بها الصاليرات الخرافية ديال شي لعابة مايستاهلو حتى الربع، الاستراتيجية الوحيدة لي لقيتي هي لعب دور الضحية و البطل فنفس الوقت.
أما المنخرطين، عمرهم نتافضو، اللهم قضية اجتماع قالو بلي على ود الانتدابات لكن فالحقيقة كان غير للمطالبة بالحضور فالنهائي، النتيجة قدامكم: صمت المنخرطين ووحدين آخرين كايقلبو على مناصب مستقبلية ووحدين لطالما هاجمو الرؤساء السابقين سكتو دبا بحال إلا النادي ماكايعيش حتى مشاكل.
ما بقا عندك ماتزيدنا من غير المونتيف.
و تمكن النسور من إحراز كأس محمد السادس للأندية الأبطال، بعد انتصاره بركلات الترجيح على اتحاد جدة السعودي، في نهائي انتهى وقته الأصلي والإضافي بأربعة أهداف لمثلها، على أرضية ملعب "مولاي عبد الله" في العاصمة الرباط.